Exodus 25
Kisakis kan me Wiahda Impwal Sarawio
(Eksodus 35.4-9)
1KAUN-O ketin mahsanihong Moses, 2“Ndaiong mehn Israel kan en wia kisakis ong ie. Ke ahpw ale soangen kisakis koaros me emenemen pahn pein nsenki kihda. 3Kisakis pwukat pahn mihmi ni kohl, silper oh prons; 4likou linen kaselel; wunen sihpw poh mei, ntahnmwel, oh poh weitahta; likou me wiawihkihda wunen kuht; 5kilin wunen sihpw wol me koaduh nan poh weitahta; kilin kou kaselel; tuhke akesia; 6lehn lamp akan; soangen mehn doalo lehn kei oh warpwohmwahu kan; 7karnelian oh kisin takai kesempwal teikan mehn kapwata en Samworo Lapalap ihpod ▼▼ IHPOD: Lepin mahsen wet iei eden lepin likou ehu me kereniong duwehte mehn pere mwaremwaren aramas. E wiawihkihda likou pweilaud oh lingan me mie pwekid ie me Urim oh Dumim kin mi loale, kisin ape riau mehn rapahki kupwur en Koht.
oh mehn kapwata perehpen mwaremware. 8Aramas akan pahn wiahda Impwal sarawi ehu ong ie, pwe I en kin koukousoan nanpwungarail. 9Re pahn wiahda Impwalo oh kapwate kan pahn kin wiawihda nin duwen koasoandi me I pahn kasalehiong uhk. Kohpwahn Inowo
(Eksodus 37.1-9)
10“Ke pahn wiahda ehu Kohpwa sang tuhke akesia, me pahn reireiki ins 45, tehlap ins 27 oh ilehki ins 27. 11Ke ahpw kidimkihla loale oh liki kohl tohr, kapilkipene kohl keile ko koaros. 12Wiahda rihng kohl pahieu mehn wisik oh katengediong ni neh pahieu en Kohpwao, riau apali a riau apali. 13Wiahda tuhkehn wisik sang ni tuhke akesia oh kidimkihla kohl, 14ke ahpw kadil tuhke ko nan rihng ko ni keile riau en Kohpwao. 15Tuhke ko pahn kin mihmihte nan rihng ko oh sohte pahn kin kohsang. 16Ke pahn kihdiong nan Kohpwao pelien takai riapali me I pahn kihwei, me kosonned kan ntinting powe.17“Ke pahn wiahda pweine me kohl tohr wia, me pahn reireiki ins 45 oh tehlapki ins 27. b 18Pil wiahda kerup ▼
▼ KERUP: Tehk ni kawehwehpen lepin lokaia kan.
riemen me perperda sang kohl, 19emen pahn mi ni apali pweinen Kohpwao a emen apali. Kerup ko pahn wiawihda patehngete pweinen Kohpwao. 20Ira pahn sohpeipene pohn pweinen Kohpwao oh kapapeseng pehra ko powe oh koaduhpwaldi. 21Kihdiong nan Kohpwao pelien takai riapalio oh pwainkihdi pweineo. 22I pahn tuhwong uhk wasao, oh pohn pweinen Kohpwao nanpwungen kerup riemeno I pahn kihong uhk kosonned koaros ong mehn Israel. Tehpel en Meirong en Pilawa ong Koht
(Eksodus 37.10-16)
23“Ke pahn pil wiahda ehu tehpel sang tuhke akesia, me pahn reireiki ins 36, tehlapki ins 18 oh ilehki ins 27. 24Kohl tohr me pahn kidim oh kapilkipene kohl ni keile ko. 25Wiahda mehn kolpene me tehlepe mihmi ni ins 3 oh kohl me pahn kidim mehn kolpeneo. 26Wiahda rihng kohl pahieu oh katengediong ehuehu ni keimw pahieu en nehn tehpelo. 27Rihng ko me pahn kol tuhkehn wa tehpelo, pahn mi limwahn keilen tehpelo. 28Tuhke akesia me pahn wia tuhkehn wa tehpelo oh pahn kidikidki kohl. 29Pil wiahda pileit, kep, sah, oh ekei pwohl mehn doadoahk ong ni meirong en wain. Mepwukat koaros pahn wiawihkihda kohl tohr. 30Tehpel wet pahn koasoansoandiong mwohn Kohpwahn Inowo, oh ahnsou koaros pilawa sarawi mehn meirong ong ie pahn kin mi pohn tepel wet. dDewen Lampo
(Eksodus 37.17-24)
31“Wiahda ehu dewen lamp me kohl tohr wia. Wiahkihda kapi oh inonde kohl me sukusukda. Wahntuhke kan me pahn kapwata, me iangahki wahntuhke mpwek oh teh, pahn patehngete dewen lampo. 32Rah weneu pahn uhsang ni keile, siluh sang ni apali, a siluh apali. 33Ni ehuehu rah weneu ko pahn kapwatki wahnrohs siluh me mwomwen masal en almond iangahki mpweke oh teh kan. 34Inonden dewen lampo pahn kapwatki wahnrohs pahieu me mwomwen masal en almond iangahki mpweke oh teh kan. 35E pahn mie ehu wahnrohs mpwek pahn ehuehu rah siluh ko koaros. 36Mpwek kan, rah kan oh dewen lampo pahn sukusukda ehute sang ni kohl tohr. 37Lamp isuh pahn wiawihda ong ni dewen lamp wet oh koasoansoandi pwe re en kin kamarainih mwowe. 38Wiahkihda kohl tohr tihpw kan oh opwong kan. 39Doadoahngki paun 75 en kohl tohr mehn wiahda dewen lamp oh dipwisawi kan koaros. 40Ke pahn kanahieng wiepen mepwukat nin duwen koasoandi me I kasalehiong uhk pohn nahnao. e
Copyright information for
PON2006A